ഇന്ത്യൻ സ്വാതന്ത്ര്യസമരത്തിന്റെ ഒരു പ്രധാന നേതാവായിരുന്നു നേതാജി എന്നാറിയപ്പെടുന്ന സുഭാഷ് ചന്ദ്ര ബോസ്. തുടർച്ചയായി രണ്ടു തവണ അദ്ദേഹം ഇന്ത്യൻ നാഷണൽ കോൺഗ്രസിന്റെ പ്രസിഡന്റായി തെരഞ്ഞെടുക്കപ്പെട്ടിട്ടുണ്ട്. ഗാന്ധിജിയുടെ സമരരീതികൾ ഇന്ത്യക്ക് സ്വാതന്ത്ര്യം നേടിത്തരാൻ പോന്നതല്ല എന്ന് അദ്ദേഹം വിശ്വസിച്ചിരുന്നു. ഓൾ ഇന്ത്യാ ഫോർവേഡ് ബ്ലോക്ക് എന്ന പേരിൽ ഒരു രാഷ്ട്രീയപ്പാർട്ടി അദ്ദേഹം രൂപവത്കരിച്ചു.
പതിനൊന്നു തവണ അദ്ദേഹത്തെ ബ്രിട്ടീഷ് അധികാരികൾ ജയിലിലടച്ചിട്ടുണ്ട്. രണ്ടാം ലോകമഹായുദ്ധം പൊട്ടിപ്പുറപ്പെട്ട സമയത്ത് അദ്ദേഹം ഇന്ത്യയിൽ നിന്നു പലായനം ചെയ്തു. ജർമ്മനിയിലായിരുന്നു അദ്ദേഹം ചെന്നെത്തിയത്. അച്ചുതണ്ടു ശക്തികളുടെ സഹായത്തോടെ ഇന്ത്യയിലെ ബ്രിട്ടീഷ് ഭരണകൂടത്തിനെതിരെ യുദ്ധം ചെയ്തു സ്വാതന്ത്ര്യം നേടിയെടുക്കുകയായിരുന്നു അദ്ദേഹത്തിന്റെ ലക്ഷ്യം.
രണ്ടാം ലോകമഹായുദ്ധത്തോടു കൂടി ബ്രിട്ടനിലുണ്ടായ രാഷ്ട്രീയ അസ്ഥിരത പരമാവധി മുതലെടുത്ത് ഇന്ത്യ സ്വാതന്ത്ര്യം നേടിയെടുക്കണം എന്നായിരുന്നു ബോസിന്റെ അഭിപ്രായം. മറ്റു രാജ്യങ്ങളിൽ നിന്നുള്ള രാഷ്ട്രീയവും, സൈനികവും, നയതന്ത്രപരവുമായുള്ള പിന്തുണ ലഭിച്ചാലേ ഇന്ത്യക്ക് സ്വാതന്ത്ര്യം പൊരുതി നേടാനാകൂ എന്ന് അദ്ദേഹം ഉറച്ചു വിശ്വസിച്ചിരുന്നു. യുദ്ധം തുടങ്ങിയപ്പോൾ കോൺഗ്രസ് നേതൃത്വത്തിനോട് കൂടിയാലോചിക്കാതെ ബ്രിട്ടീഷ് സർക്കാർ ഇന്ത്യയെയും യുദ്ധപങ്കാളിയാക്കി. ഇതിനെതിരെ അദ്ദേഹം പ്രക്ഷോഭങ്ങൾ സംഘടിപ്പിക്കാൻ ശ്രമിച്ചു. അപ്പോൾ അധികൃതർ അദ്ദേഹത്തെ ജയിലിലടച്ചു. പക്ഷേ ജയിലിൽ തുടങ്ങിയ നിരാഹാരസമരം 7 ദിവസമായപ്പോഴേക്കും അദ്ദേഹത്തെ മോചിപ്പിച്ചു, പക്ഷേ കൽക്കട്ടയിലെ ബോസിന്റെ വസതി പോലീസ് നിരീക്ഷണത്തിലായിരുന്നു.
1941 ജനുവരി 19 ന് തന്റെ അനന്തരവനായ ശിശിർ കെ ബോസിനോടൊപ്പം നിരീക്ഷകരുടെ കണ്ണു വെട്ടിച്ച് ബോസ് രക്ഷപ്പെട്ടു. പേഷാവറിലേക്കാണ് അദ്ദേഹം പോയത്. അവിടെ നിന്ന് അഫ്‌ഗാനിസ്ഥാനും, സോവിയറ്റ് യൂണിയനും കടന്ന് ജർമ്മനിയിലെത്തി. വേഷം മാറിയാണ് അദ്ദേഹം സഞ്ചരിച്ചത്. ആദ്യം സിയാവുദ്ദീൻ എന്ന പേരിൽ പത്താൻ വംശജനായ ഇൻഷുറൻസ് ഏജന്റിന്റെ വേഷത്തിൽ അഫ്‌ഗാനിസ്ഥാനിൽ എത്തി. അവിടെ നിന്നും കൌണ്ട് ഒർലാണ്ടോ മസ്സോട്ട എന്ന ഇറ്റലിക്കാരനായി മോസ്കോയിലെത്തി. അവിടെ നിന്നും റോമിലും അവസാനം ജർമ്മനിയിലും എത്തിച്ചേർന്നു.
റാഷ് ബിഹാരി ബോസ് 1943 ജൂലൈ 4 ന് സിംഗപ്പൂരിലെ പ്രസിദ്ധമായ കാഥേ ഹാളിൽ വച്ച് ഇന്ത്യൻ ഇൻഡിപ്പെൻഡൻസ് ലീഗിന്റെ നേതൃത്വം സുഭാസ് ചന്ദ്ര ബോസിനു കൈമാറി. അടുത്ത ദിവസം ജൂലൈ 5 ന് ആസാദ് ഹിന്ദ് ഫൌജ് അഥവാ ഇന്ത്യൻ നാഷനൽ ആർമി(ഐ.എൻ.എ INA) രൂപവത്കരിച്ച വിവരം അദ്ദേഹം ലോകത്തെ അറിയിച്ചു.
1945 ഓഗസ്റ്റ് 18 ന് ബോസ് തായ്‌വാനിലെ തെയ്ഹോകു വിമാനത്താവളത്തിലുണ്ടായ അപകടത്തിൽ മരിച്ചു എന്നാണ് ഇന്ത്യൻ ഗവണ്മെന്റിന്റെ ഔദ്യോഗിക ഭാഷ്യം.
INA യുടെ പേരില്‍ സ്റ്റാമ്പുകളും ഒരു വശം മാത്രം മുദ്രണം ചെയ്ത പ്രോമിസറി നോട്ടുകളും ഇറങ്ങിയിരുന്നു. ആസാദ് ഹിന്ദ് നാണയങ്ങളും കണ്ടു വരുന്നു.
ആസാദ് ഹിന്ദ് കറൻസി, സ്റ്റാമ്പ്, നാണയങ്ങൾ
ഇവ ഉണ്ടായിരുന്നോ ... സാധുത ഉണ്ടായിരുന്നോ ...
ഉവ്വ്, ഇവ ഉണ്ടായിരുന്നു. INA ക്ക് വിലക്ക് ഉണ്ടായിരുന്നതിനാൽ സ്വാഭാവികമായി അവയ്ക്കും നിയമ സാധുത ഉണ്ടരുന്നില്ല എന്നാല്‍ ഈ പ്രസ്ഥനത്തിൽ ആകൃഷ്ടരായ അനേകം പേര് ഇന്ത്യയിലും വിദേശത്തും വിശിഷ്യാ സിങ്കപ്പൂര്‍, മലയ എന്നിവിടങ്ങളില്‍ ഉണ്ടായിരുന്നു. ബ്രിട്ടീഷ് രാജിനോടുള്ള സന്ധിയില്ലാ സമരത്തിന്റെ മുഖമുദ്ര ആയിരുന്നു ഇവ. നിരോധിതമായതിനാൽ അവയുടെ അച്ചടി തന്നെ വിദേശത്ത് ആയിരുന്നു. ഒപ്പം പ്രചാരവും. പ്രസ്തുത കറൻസി ഒരു ധനസമാഹരണ ഉപാധി ആയിരുന്നു എന്ന് പറയപ്പെടുന്നു.
നമുക്ക് സ്വാതന്ത്ര്യം ലഭിക്കുമ്പോൾ Azad Hind ന്റെ പ്രസക്തി INA ക്ക് ഇടയിൽ നഷ്ടപ്പെട്ടിരുന്നില്ല. സുഭാഷ് ചന്ദ്രബോസിനെ കണ്ടുകിട്ടിയാൽ വിചാരണയ്ക്ക് വിധേയമാകണം എന്ന് ബ്രിട്ടീഷുകാർ നിഷ്കർഷിച്ചിരുന്നു. അദ്ദേഹത്തിന്റെ തിരോധാനം അന്നും ഇന്നും തർക്കവിഷയം ആണ്. ബ്രിട്ടീഷ് ഇന്ത്യയോ, സ്വതന്ത്ര ഇന്ത്യയോ മറ്റു സ്വാതന്ത്ര്യ സമര പ്രസ്ഥാനങ്ങളോ അദ്ദേഹത്തിന്റെ നാണയങ്ങൾ അംഗീകരിച്ചിരുന്നില്ല. എന്തിന് ആശയം പോലും. എന്നിരുന്നാലും ഏവരും സ്വപ്നം കണ്ട ആ സ്വാതന്ത്ര്യം INA യും ആഘോഷിച്ചു. അന്ന് നിലവിൽ ഉണ്ടായിരുന്ന നാണയത്തിന്റെ രൂപത്തിൽ, അഘണ്ഡ ഭാരതമാണ് ആ നാണയത്തിൽ കൂടി വിഭാവന ചെയ്തത്. (ആ സ്മാരകമാണ് ചിത്രത്തില്‍). സ്വാതന്ത്ര്യം കിട്ടിയത് തന്നെ വിഭജനം അംഗീകരിക്കപ്പെട്ടതിന് ശേഷമാണ്. INA യുടെ അജണ്ടയിൽ വിഭജനം ഒരു വിഷയം ആയിരുന്നില്ല. സ്വാതന്ത്ര്യം കിട്ടിയ അന്നും, അതിന് ശേഷവും സുഭാഷ് ചന്ദ്രബോസ് ജീവിച്ചിരുന്നു എന്ന് INA ദൃഢമായി വിശ്വസിക്കുന്നു. വിമാന അപകടം അവർ തള്ളിക്കളയുന്നു. ഒരു പ്രൊവിഷണൽ സര്‍ക്കാര്‍ ആയതിനാൽ ഇവയെ വിനിമയ നാണയം അല്ല എന്ന് പറയുകയോ, INA യെ പോലെ അംഗീകരിക്കുകയോ ചെയ്യാം. സ്വാതന്ത്ര്യ സമര ചരിത്രത്തിന്റെ പിന്നമ്പുറത്തേക്ക് പോകുമ്പോൾ ഇൗ പ്രസ്ഥാനത്തിന്റെ നിസ്വാർഥമായ പങ്ക്, പ്രാധാന്യം, ഒരു ന്യൂനപക്ഷത്തിന് എങ്കിലും കാണാതിരിക്കാൻ ആവില്ല.
